Amun kada dibuka, urang kada tahu kalirnya: habang, hirang, habuk, atawa ramania. “Katahuan habang-hirangnya” asalnya paribasa Banjar gasan urang batanding kuntau.
Bahanu ada panguntauan nang, sabalum batanding, palalau-palalau, piragah jagau. Imbah batanding, hanyar “katahuan habang-hirangnya”: bujuran jagau, atawa pandir wara.
Takisah, Utuh Tipang. Bulik labuh matan indung banua Banjar, Kalimantan Selatan, Pambakal Utuh Jagau manyarui bubuhan tatuha kampung ka rumahnya. Imbah Isya, urang bajurut tulakan, bajalan batis, baimbaian.
“Nah, tunya Utuh Tipang-nya...!” ujar Utuh Kabuau nang duduk di palidangan.
“Napa pulang?” ujar Utuh Tipang, takurihing, imbah duduk di higa nang lain.
“Dikinum tih lapasnya, makan pisang bajarangnya!” ujar Pambakal Utuh Jagau. “Tadi Utuh Puyau manakuni kita nang labuh ka Banjar samalam, Utuh Tipang ai, wayah hubnur maangkat bupati wan walikota. Ujar Utuh Puyau, amanah juakah bubuhannya? Busihalah kita tapilih bangkung? Busihalah waluh bajarang jua? Ujarku...”
“Cah, hubnur, bupati wan walikota nang hanyar tu kada pacangan amanah...!” Utuh Puyau mamanglah pandiran Pambakal Utuh Jagau. “Bubuhannya mambulikakan mudal, bacari kasugihan gasan inya wan kula-kulanya haja! Baingatan ha, kartak magun haja balubak, kabun sawit babanyak, batu harang disungkali, listrik mati! Usaha sasain sakit, sakit pada kayap!”
“Nah, hikamam...,” Pambakal Utuh Jagau tauling kapala, cangang ka bubuhannya.
“Jangan mawada,” ujar Utuh Tipang. “Kada baik buruk sangka. Buhannya hanyar bamula. Buhannya bajanji amanah, pacang bausaha gasan kamaslahatan warga.
Kita hadangi haja. Kaina katahuan habang-hirangnya...”
No comments: