Gasan karakatan wan kamaslahatan sabarataan, urang musti kurang-labih lawan nang lain. Urang Banjar kada katuju lawan urang nang kada hakun kurang-labih. Sama kaya “tangga urang diulur, tangga saurang disintak”, “kada hakun balabih urat tulang” paribasa Banjar gasan urang nang “kada hakun kurang-labih”.
Takisah, Utuh Tipang. Imbah datang pahumaan, hanyar babasuh batis di padu, anaknya Utuh Alui baucap sambil mainan lawan adingnya: “Bah, pian dikiau Uma...!” Sambil mamutiki dadaian di higa rumah, bininya Aluh Kaciput baucap: “Pian dicari’i Pambakal di warung...!”
Lapah, lamah limbai, Utuh Tipang bajalan ka warung. Sakalinya kada Pambakal Utuh Jagau haja, di bangku warung ada jua nang lain.
“Hau... Pina takumpulan. Napa habar, Pambakal?” ujar Utuh Tipang.
“Iya am,” ujar Pambakal Utuh Jagau. “Aku mambawai warga bahandip mambaiki hatap rumah Utuh Kihit nang ditampur angin tutus, tagal bubuhannya kada hakun.”
“Siapa nang kada hakun?” ujar Aluh Kaciput nang hanyar datang matan rumah.
“Aku, Utuh Puyau wan Utuh Kaminting!” ujar Utuh Kabuau. “Baapa kita mambaiki rumah Utuh Kihit? Inya kada suah umpat bahandip, gawi sabumi lawan urang kampung! Ingatlah wayah rumah Utuh Kijing kasalukutan? Inya bahigaan rumah, tagal baranai haja, kita maka am abut mamajahi api! Disaru urang baaruhan, inya kada datang jua!”
“Nah, hikamam,” Utuh Tipang bagaru kapala. “Dimapa, Pambakal?”
“Iya am,” ujar Pambakal Utuh Jagau. “Aku jadi saraba ngalih. Inya jua pang nang kada hakun balabih urat tulang...”
No comments: